Gin Kings pinataob ang Beermen
Ipinalasap ng Barangay Ginebra Gin Kings ang bagsik ng “Never Say Die” nang magpakawala si Japeth Aguilar ng bumubulusok na buzzer beater jumper upang maungusan ang San Miguel Beermen at maipanalo ang pangatlong laban, 97-96 sa Best of 5 Semi-Finals ng Oppo Philippine Basketball Association Governor’s Cup na ginanap sa Smart Araneta Coliseum, Setyembre 30.
Nanguna na sa kartada ang Gin Kings, 2-1 at isa nalang na panalo ang kailangan upang makapasok silang muli sa Finals pagkatapos ng tatlong taong hindi pagkakapasok.
Pinilit kumawala ng Beermen sa huling quarter subalit hindi ito hinayaan ng Gin Kings nang magpakawala sila ng mga nag-aapoy na pagbuslo sa pangunguna ni Scottie Thompson na itinanghal din na unang rookie player na gumawa ng double triple, 12 puntos, 11 rebounds at 10 assists at ipanalo ang laro, 97-96.
Sa first half, dikdikan ang labanan ng dalawang koponan nang parehong magpakawala ng mga naglalagablab na 3 point shots at lumamang pa ang Beermen sa pangunguna ng kanilang import na si Elijah Millsap na kumamada ng 24 puntos, 55-51.
Naitala ang kartadang 29-28, 51-55, 78-77 at 97-96. Samantala, gaganapin ang ikaapat na laro sa Smart Araneta Coliseum sa Oktubre 2, Linggo.
